ਬੋਲੀ

ਕੌੜੀ ਵੇਲ ਵਾਂਗੂੰ ਵਧ ਨਾ ਸਾਲੀਏ,
ਬੋਲ ਬੋਲ ਨਾ ਮਾੜੇ...
ਨੀ ਅੜਬ ਸੁਭਾਅ ਦੇ ਪੁੱਤ ਜੱਟਾਂ ਦੇ,
ਦਿਨੇ ਦਖਾਉਂਦੇ ਤਾਰੇ..
ਇੱਕ ਵਾਰੀ ਜੇ ਵਿਗੜ ਗਏ,
ਕੱਢਦੀ ਫਿਰੇਂਗੀ ਹਾੜ੍ਹੇ।
ਜੇ ਅਸੀਂ ਵਿਗੜ ਗਏ ਤਾਂ ਕੱਢਦੀ ਫਿਰੇਂਗੀ ਹਾੜ੍ਹੇ।

ਬੋਲੀ

ਗਿੱਧੇ ਦੇ ਵਿੱਚ ਰੌਣਕ ਹੋ ਗਈ, ਸਭੇ ਸਹੇਲੀਆਂ ਆਈਆਂ
ਨੱਚਣ ਕੁੱਦਣ ਖੇਡਾਂ ਖੇਡਣ, ਨੰਦਨ ਤੇ ਭਰਝਾਈਆਂ
ਉੱਡ ਜਾ ਕਬੂਤਰੀਏ, ਵੇਖ ਘਟਾ ਚੜ੍ਹ ਆਈਆਂ ।
ਉੱਡ ਜਾ ਕਬੂਤਰੀਏ, ਵੇਖ ਘਟਾ ਚੜ੍ਹ ਆਈਆਂ ।

ਕਥਨ (ਕੋਟੇਸ਼ਨਾਂ) - ਮਾਂ

ਮਾਂ ਵਰਗਾ ਘਣਛਾਵਾਂ ਬੂਟਾ, ਮੈਨੂ ਨਜ਼ਰ ਨਾ ਆਏ।
ਲੈ ਕੇ ਜਿਸ ਤੋਂ ਛਾਂ ਉਧਾਰੀ, ਰੱਬ ਨੇ ਸੁਰਗ ਬਣਾਏ ।
ਬਾਕੀ ਕੁੱਲ ਦੁਨੀਆ ਦੇ ਬੂਟੇ ਜੜ੍ਹ ਸੁੱਕੇਆਂ ਮੁਰਝਾਂਦੇ,
ਐਪਰ ਫੁੱਲਾਂ ਦੇ ਮੁਰਝਾਇਆਂ, ਇਹ ਬੂਟਾ ਸੁੱਕ ਜਾਏ ।  

ਕਥਨ (ਕੋਟੇਸ਼ਨਾਂ) - ਪੰਜਾਬ

ਸੋਹਣਾ ਦੇਸ਼ਾਂ ਅੰਦਰ ਦੇਸ਼ ਪੰਜਾਬ ਨੀ ਸਈਓ,
ਜਿਉਂ ਫੁੱਲਾਂ ਅੰਦਰ ਫੁੱਲ ਗੁਲਾਬ ਨੀ ਸਈਓ।  

ਕਿਰਪਾ ਸਾਗਰ

ਬਾਬਾ ਬੁੱਲੇ ਸ਼ਾਹ - ਇਲਮੋਂ ਬੱਸ ਕਰੀਂ ਓ ਯਾਰ

ਪੜ੍ਹ ਪੜ੍ਹ ਮਸਲੇ ਰੋਜ਼ ਸੁਣਾਵੇਂ, ਖਾਣਾ ਸ਼ੱਕ ਸ਼ੁਬਹੁ ਦਾ ਖਾਵੇਂ ।
ਦੱਸੇਂ ਹੋਰ ਤੇ ਹੋਰ ਕਮਾਵੇਂ, ਅੰਦਰ ਖੋਟ ਬਾਹਰ ਸਚਿਆਰ ।
ਇਲਮੋਂ ਬੱਸ ਕਰੀਂ ਓ ਯਾਰ । 
ਪੜ੍ਹ ਪੜ੍ਹ ਇਲਮ ਲਗਾਵੇਂ ਢੇਰ, ਕੁਰਾਨ ਕਿਤਾਬਾਂ ਚਾਰ ਚੁਫ਼ੇਰ । 
ਗਿਰਦੇ ਚਾਨਣ ਵਿਚ ਅਨ੍ਹੇਰ, ਬਾਝੋਂ ਰਾਹਬਰ ਖ਼ਬਰ ਨਾ ਸਾਰ । 
ਇਲਮੋਂ ਬੱਸ ਕਰੀਂ ਓ ਯਾਰ ।

ਸੁਨਹਿਰੀ ਹਰਫ਼ - ਬਾਬਾ ਬੁੱਲੇ ਸ਼ਾਹ

ਮੱਕੇ ਗਿਆਂ ਗੱਲ ਮੁੱਕਦੀ ਨਾਹੀਂ, ਜਿਚਰ ਦਿਲੋਂ ਨ ਆਪ ਮੁਕਾਈਏ । 
ਗੰਗਾ ਗਿਆਂ ਗੱਲ ਮੁੱਕਦੀ ਨਾਹੀਂ, ਭਾਵੇਂ ਸੌ ਸੌ ਗੋਤੇ ਲਾਈਏ । 
ਗਯਾ ਗਿਆਂ ਗੱਲ ਮੁੱਕਦੀ ਨਾਹੀਂ, ਭਾਵੇਂ ਕਿਤਨੇ ਪਿੰਡ ਭਰਾਈਏ ।
ਬੁੱਲ੍ਹਾ ਸ਼ਾਹ ਗੱਲ ਤਾਂ ਹੀ ਮੁੱਕਦੀ, ਜਦ ਮੈਂ ਨੂੰ ਖੜੇ ਲੁਟਾਈਏ ।

ਕੋਟੇਸ਼ਨਾਂ - ਬਾਬਾ ਬੁੱਲੇ ਸ਼ਾਹ

ਬੁੱਲ੍ਹਾ ਸ਼ਹੁ ਅਸਾਂ ਥੀਂ ਵੱਖ ਨਾਹੀਂ,
ਪਰ ਦੇਖਣ ਵਾਲੀ ਅੱਖ ਨਾਹੀਂ,
ਤਾਹੀਉਂ ਜਾਨ ਜੁਦਾਈਆਂ ਸਹਿੰਦੀ ਏ ।